Alle Beiträge

22. November 2026

5 Jahr Tivoli

5 Jahr Tivoli. 5 Jahr prägt vo ganz vielne frömde Lüt wo si bekannte Gsichter oder ou wunderbari Fründe worde, 5 Jahr prägt vo viel schaffä...

5 Jahr Tivoli

5 Jahr Tivoli. 5 Jahr prägt vo ganz vielne frömde Lüt wo si bekannte Gsichter oder ou wunderbari Fründe worde, 5 Jahr prägt vo viel schaffä, viel putzä, viel umstellä, viel Maschine flickä und ersetzä und mengisch vo einisch eine z viel z trinke nachem Firabe.

5 Jahr prägt vo sehr viel lachä und vielne tolle Teammitglieder, prägt vo viel optimiere und neu iirichte, vore geng grösser wärdende Terrasse und vor allem prägt vo vielne unvergässleche und schöne Momäntä. Mir hei extrem viel glehrt und ou gmerkt, dass ir Gastronomie nid nur z Handwärk sondern ou dr Umgang mit dä Gescht wichtig isch. Mir hei wölle es Wohnzimmer schaffä für z Bödeli u hoffe, das mir däm grächt wärdä und säch üsi Gescht bi üs wie daheime füehle.

Teu füehle säch sogar so fescht daheime, dass sie ihres umkippte Bier bim Bierpong sälber putze und z Putzzüg allei gö i Chäller ga versorge ;)

Ou d Charte hei mir dank üsere liebe Smilla chönne witerentwickle: vore eifache laminierte Charte entworfe ufem PowerPoint-Programm zure wunderschön gstaltete Getränk- und Ässenscharte mit Illustratione und Gstaltig vor Smilla Berger.
Ou d Terrasse hei mir vo 24 uf 45 Usseplätz dörfe vergrössere und hei mir über d Jahr immer meh dörfe schmücke ou Dank Boum-Spändä vom Hotel Interlake.

U nach 2 Jahr Tivoli isch de du sogar no üses zwöite Härzensprojekt mitem Marina drzue cho, Danke liebi Patrizia und liebe Tinel das mir öies Pistache hei dörfe übernäh!

Dir, liebi Gescht, wüsst gloub gar nid, wie viel üs das ganze hie bedütet: wie viel dases üs bedütet we dir geng wieder zu üs chömet, we dir üsi Terrasse gniesset, we dir öich a üsi Spielturnier amäldet und voller Engagement mitspielet und mitfieberet, we dir so viel Velos vor dranne abstellet dasses usgseht wie z Holland, we dir öii Liebi vom Läbä bi üs lehret kennä u schlussändlech ou hüratet, we dir üs öii Chind chömet cho vorstelle und mit öine junge Hünd zu üs chömet cho üebe wie säch ire Beiz z verhalte, we mir dörfe Teil vo öiem Läbä si. Ds si alles ganz chlini bis ganz grossi Momäntä wo für üs extrem wichtig si und ou dr Grund isch warum mir das alles so gärn mache.

Bis gli im Tivoli
Smilla, Brit & Jana

Tivoli · Marina · Montana

Post für gute Momente.

Neuigkeiten und Events direkt in dein Postfach – mit unserem Newsletter.

Zum Newsletter anmelden